قازاقستاننىڭ سىرتقى ىستەر ءمينيسترى بولىپ بەيبىت باكىر ۇلى اتامقۇلوۆ تاعايىندالدى. ارينە، كادرلىق تاعايىنداۋلاردىڭ بولاتىنى جونىندە ساراپشىلىر ايتىپ جۇرگەنىمەن، بۇل جايت ءدال جاڭا جىلدىڭ الدىندا ورىن الادى دەپ ەشكىم ويلاعان جوق. ءبىراق قالاي ايتقاندا دا، كادرلىق وزگەرىستىڭ ورىن الاتىنى انىق ەدى. ارينە، پرەزيدەنتتىڭ بۇل تاعايىنداۋلارى كەيبىرەۋلەر ءۇشىن كۇتپەگەن قادام بولۋى دا مۇمكىن. ءبىراق بەيبىت اتامقۇلوۆتىڭ سىرتقى ىستكەر ءمينيسترى لاۋازىمىنا كەلۋىن توسىن وقيعا دەپ ايتۋعا كەلمەيدى. ويتكەنى ول بۇل سالاعا ءبىرىنشى رەت بارىپ وتىرعان جوق. ەڭبەك جولىن بالقىتۋشى بولىپ باستاعان بەيبىت باكىر ۇلىنىڭ ماماندىعى – ەكونوميست. ول قازاق پوليتەحنيكالىق ينستيتۋتىن، سانكت-پەتەربور مەملەكەتتىك ەكونوميكا جانە قارجى ۋنيۆەرسيتەتىن بىتىرگەن. ەكونوميكا عىلىمدارىنىڭ كانديداتى. 2006-2012 جىلدارى جۇڭگو مەن رەسەيدە ديپلوماتيالىق قىزمەتتە بولدى. مالايزيادا، يندونەزيا، برۋنەي-دارۋسسالامداعى، فيليپپين رەسپۋبليكاسىنداعى توتەنشە جانە وكىلەتتى ەلشىسى مىندەتىن قوسا اتقارعان. التى جالدان استام ديپلوماتيالىق قىزمەتتە بولعان ول ءبىرقاتار مينيسترلىكتەردە جاۋاپتى حاتشى بولدى. اراسىندا وڭتۇستىك قازاقستان وبلىسىنىڭ اكىمى قىزمەتىن دە اتقاردى. سوڭعى قىزمەتى - قورعانىس جانە اەروعارىش ونەركاسىبى مينيسترلىگى.
ەندەشە ديپلوماتيالىق جۇمىسىنا ەندى كىرىسكەن، مەملەكەتتىك قىزمەتتە مول تاجىريبەسى بار بەيبىت اتامقۇلوۆ سىرتقى ىستەر ءمينيسترى لاۋازىمىندا ءوزىن جاڭا قىرىنان تانىتادى ويدامىز. وسىعان وراي، جاڭا مينيسترگە ايتار ءبىراز ۇسىنىسىمىز دا بار.
- الەمدە سوعىس ساۋداسى كۇشەيىپ، الپاۋىت ەلدەردىڭ ادۋىندى ارەكەتتەرى مەن قيتۇرقىلىق ساياساتى جاھانعا ءقاۋىپ ءتوندىرىپ وتىرعان ۋاقىتتا قازاقستان سىرتقى ساياساتتا قانداي جاعدايعا قاراماستان ءوزىنىڭ دەربەس ساياساتىن جۇرگىزۋى ءتيىس.
- قازاقستان قاۋىپسىزدىك كەڭەسىنىڭ تۇراقتى ەمەس مۇشەسى رەتىندە حالىقارالىق جيىنداردا جانە بۇۇ مىنبەلەرىندە قالىس قالماي، ەشكىمگە جالتاقتاماي، ءوز پوزيسياسى مەن داۋىسىن انىق ءارى اشىق بىلدىرگەنىن قالايمىز.
- حالىقارالىق قوعامداستىقتا قازاقستان كوپ رەتتە ءوز ساياساتىن رەسەيدىڭ پوزيسياسىنا قاراي ۇيلەستىرەدى. سولاردىڭ ارەكەتىنە قاراپ، داۋىس بەرەتىن جايتتار دا از ەمەس. تاۋەلسىز ەلگە ابىروي اپەرمەيتىن مۇنداي قادامنان قاشان دا قاشىق بولعانىمىز دۇرىس.
- پرەزيدەنت نازاربايەۆ تۇركى تىلدەس ەلدەردىڭ ۇستانىمى مەن ىنتىماقتاستىعىن نىعايتۋ جونىندە ۇدايى ايتىپ كەلەدى. تۇپكى تاريحىمىز بەن باۋىرلاستىق ساياساتىمىز ءبىر بولعاندىقتان تامىرلاس ەلدەر اراسىندا ەشقاشان تەكەتىرەس بولمايتىنى ول انىق. تۇركى الەمى بۇگىندە بىرلىك پەن ءتيىمدى ىنتىماقتاستىقتىڭ جولىن تاڭدادى. سوندىقتان سىرتقى ىستەر مينيسترلىگى الەمدىك قوعامداستىقتا تۇركى تىلدەس ەلدەردىڭ ىقپالىن بارىنشا كۇشەيتۋگە جۇمىس ىستەۋى ءتيىس.
- قالاي ايتساق تا، ءقازىر حالىق اراسىندا جۇڭگو مەن رەسەي ەكسپانسياسىنا قاتىستى ۇلكەن ۇرەي بار. سوندىقتان سىرتقى ىستەر مينيسترلىگى قازاق حالقىنىڭ مۇددەسىن ناقتى ءارى ۇنەمى ەسكەرىپ وتىرۋى ءتيىس. قاجەت جاعدايدا باتىل شەشىم قابىلداعانى دا دۇرىس،
- ءقازىر قىتايداعى قانداستارىمىز قىسىم كورىپ، قۋدالانىپ جاتقانى جالپاق جۇرتقا بەلگىلى. ءقازىر بۇل ماسەلە حالىقارالىق جيىنداردا ايتىلىپ، مۇقىم دۇنيەگە ءمالىم بولدى. سوندىقتان ارتىندا ارقاسۇيەر مەملەكەتى بار ەل رەتىندە قانداستارىمىزدىڭ قۇقىن قورعاۋدى مينيسترلىك ءوز موينىنا الىپ، ولاردىڭ ءبىرجولا بوستاندىققا شىعۋىن باتىل تالاپ ەتۋى ءتيىس. سونىمەن قاتار، الەمنىڭ ءار تۇكپىرىندە جۇرگەن وتانداستارىمىزدىڭ ەلگە ورالۋىنا بار مۇمكىندىك پەن جەڭىلدىك جاسالۋى كەرەك.
